Tedes algo que comunicar?

Un ano máis a Concellaría de Xuventude do Concello de Soutomaior convoca o Concurso Literario Verbas para comunicar, que xa chega á súa sétima edición. Este certame ten como obxectivo impulsar a creatividade, a comunicación e a lingua galega entre a mocidade do municipio. O Equipo de Normalización Lingüística do colexio, xunto co Departamento de Lingua Galega e o profesorado do ámbito sociolingüístico, colaboran neste certame para celebrar o Día das Letras Galegas, que este ano se lle dedica ao poeta Xosé María Díaz Castro. Nos taboleiros das aulas da ESO tamén podedes consultar as bases do concurso, que coma sempre ten uns premios moi atractivos en cada unha das categorías (A, de 12 a 14 anos; e B, de 15 a 18):

• 1º Premio: Tablet
• 2º Premio: Libro electrónico
• 3º Premio: Cámara fotográfica
• 4º Premio: Marco dixital
• 5º Premio: Impresora
• 6º Premio: auriculares

As bases son moi flexibles e abertas para que todos e todas vós atopedes iso tan importante que queredes expresar. Os requisitos básicos son:

1. A temática será libre tendo en conta que o obxectivo xeral é transmitir unha idea, unha opinión, un sentimento... que desexemos compartir con outras persoas.
2. Estará redactado en galego e valorarase a corrección lingüística, así como a presentación adecuada e a orixinalidade do traballo.
3. O texto non poderá superar as 12 liñas e presentarase en papel ou cartolina que non supere o tamaño A4. O formato é, polo tanto, tamén libre: prosa, poesía, unha mensaxe, unha carta, un artigo de opinión, etc.

Pensade nunha idea, tirade dela, dádelle forma, pensade nos materiais se ides debuxar ou ilustrar o texto e... non deixedes de consultar todas as dúbidas cos vosos profesores e profesoras e, xa sabedes

E non esquezades que o prazo remata o 9 de maio!

"Mitos e realidades", un obradoiro de banda deseñada con Xosé Tomás

O ilustrador e humorista gráfico Xosé Tomás impartirá un obradoiro de banda deseñada este xoves 10 de abril para o alumnado de 3º da ESO nunha actividade que organizan conxuntamente diferentes departamentos do noso colexio baixo a coordinación do Equipo de Normalización Lingüística. 

Xosé Tomás, que profesionalmente exerce como profesor de Inglés no ensino secundario, ten unha traxectoria moi dilatada no mundo da ilustración e o humorismo gráfico, da banda deseñada, do cartelismo e no ámbito das artes plásticas en xeral; unha boa mostra dos seus traballos poden verse no seu blogue. 

A súa obra abrangue tantos campos que nos sería complicado facer aquí un resumo de todos eles, mais de seguro que se botades unha ollada na nosa biblioteca atoparedes o nome deste debuxante como ilustrador dunha chea de obras de literatura infantil e xuvenil ou como colaborador na xa extinta revista Golfiño, entre outras moitas publicacións. Na biblioteca tamén podedes encontrar a novela gráfica Nomades, oito historias que nos achegan ao fenómeno da emigración en clave feminina.   

Toponimia de Soutomaior

Mañá teremos a oportunidade de coñecer máis polo miúdo a toponimia do noso concello e dos municipios limítrofes da man de Vicente Feijóo Ares, investigador do Seminario de Onomástica da Real Academia Galega. O noso convidado, licenciado en Filoloxía Galego-Portuguesa da USC, foi coordinador do proxecto Toponimia de Galicia, que ten como obxectivo contribuírmos a coñecer mellor e preservar a nosa identidade a través da compilación dos nomes de lugar, que podemos consultar a través da páxina web do proxecto. 

Ninguén mellor, polo tanto, que Vicente Feijóo para coñecer a nosa toponimia máis próxima, o seu significado, como a podemos clasificar, todo o que nos conta sobre o noso pasado colectivo, que utilidade ten para nós, que ferramentas tecnoloóxicas temos ao noso dispór para situármonos con nomes propios no mundo, etc. 

Concurso de Mensaxes Breves de Amor

Febreiro chegou coa Candeloria (día 2), o día no que os paxaron casan e a partir do cal ningunha ave voa soa, e seguiu co San Valentín (día 14), unha celebración desvirtuada pola súa dimensión comercial pero que tamén nos dou pé para rematar o mes cun concurso de mensaxes de amor (ou de desamor) que ten unha característica moi especial: trátase de espremer ao máximo a vosa creatividade nun máximo de 140 caracteres. Xa sabedes, toca expresar as emocións e sentimentos amorosos como se fose para un chío do twitter... e en galego, unha lingua ben amorosa.

 CONCURSO DE MENSAXES BREVES DE AMOR

E por  que non llo dis en galego?

O Equipo de Dinamización da Lingua Galega do CPI Manuel Padín Truiteiro convoca o Concurso de Mensaxes Breves de Amor no mes da Candeloria (2 de febreiro), o día no que os paxariños casan, e o San Valentín (14 de febreiro).

BASES

1.   Poderá participar todo o alumnado da ESO entre o 14 e o 28 de febreiro de 2014.

2.   O certame consiste na elaboración dunha mensaxe breve de amor en lingua galega.

3.   Cada alumno/a participante deberá escribir unha única mensaxe nun post-it que pegará no taboleiro disposto no primeiro andar e identificarase cun pseudónimo. Así mesmo, deberán cubrir unha tarxeta branca que inclúa o pseudónimo, nome e apelidos e grupo, e depositala na urna disposta a tal efecto a carón do taboleiro. 

4.   A mensaxe non debe superar os 140 caracteres (incluídos espazos en branco e as emoticonas) e será inédita.

5.   Valorarase a creatividade e a orixinalidade da mensaxe e serán excluídos todos aqueles textos de carácter discriminatorio ou ofensivo.

6.   Establécese un sistema de votación popular para elixir as mensaxes gañadoras. Poderán votar ata o día 5 de marzo todos os alumnos e alumnas da ESO cun só voto por persoa. Para iso, deberán cubrir unha tarxeta amarela co seu nome e apelidos e identificar a mensaxe elixida co pseudónimo co que foi asinada. Os votos serán depositados nunha urna disposta a tal efecto.

7.   Establécense dous premios por categoría (1º e 2º ciclo) e mais un premio para un/unha dos/as alumnos/as votantes, que será escollido ao chou de entre todas as tarxetas de votación depositadas na urna.

8.   A participación neste concurso implica a aceptación destas bases.

Tecer historias, vestirse de palabras

Comezamos unha nova etapa

O Equipo de Normalización e Dinamización Lingüística do colexio comeza unha nova etapa dixital coa posta en marcha deste novo sitio web, Latexos da Lingua, que é o nome da nosa revista e que vén dar continuidade ao noso vello e querido blogue, que cubriu anos de intenso e feliz traballo do Equipo, o profesorado e o alumnado do centro. 

Dende esta primeira entrada queremos agradecer o labor de todos os compañeiros e compañeiras que protagonizaron esa etapa na rede, pero sobre todo nos corredores e aulas do colexio e nas rúas e prazas de Soutomaior coa ilusión de facer avanzar o uso da lingua galega entre a comunidade educativa e o seu contorno e de dignificar o noso idioma contrarrestando os antigos e os novos prexuízos existentes na sociedade.

Moitos parabéns e moitas grazas!